اقوام متحدہ کا غزہ کا محاصرہ توڑنے کا مطالبہ، حماس کا خیر مقدم

(ایجنسی)
اسلامی تحریک مزاحمت "حماس" نے اقوام متحدہ کے امدادی ادارہ برائے فلسطینی پناہ گزین"اونروا" کی جانب سے فلسطینی شہر غزہ کی پٹی کا محاصرہ توڑنے کے مطالبے کا خیر مقدم کیا ہے۔

مرکز اطلاعات فلسطین کے مطابق حماس کے ترجمان فوزی برھوم نے اپنے ایک بیان میں کہا ہے کہ "انروا" کے ہائی کمشنر فیلپو گرانڈیو کی جانب سے غزہ کی پٹی کا معاشی محاصرہ ختم کرنے اور شہر کے تمام بیرونی راستے کھولنے کا مطالبہ حق بہ جانب اور قابل ستائش ہے۔ مصر کو فوری طور پر غزہ کی پٹی کی بیرونی راہداری کھول دینی چاہیے۔
 
خیال رہے کہ "اونروا" کے ہائی کمشنر مسٹر گرانڈیو نے اپنے ایک تازہ بیان میں غزہ کی پٹی کی موجودہ صورت حال پر گہری تشویش کا اظہار کیا ہے۔ ان کا کہنا ہے کہ غزہ کی پٹی کا محاصرہ اور



مصر کی جانب سے رفح راہداری کی بندش "غیرقانونی اور غیراخلاقی" اقدامات ہیں۔
 
حماس کے ترجمان کا کہنا تھا کہ "اونروا" کے سربراہ کا بیان غزہ کے موجودہ بحران کی عکاسی کر رہا ہے۔ غزہ کی پٹی دنیا کی سب سے بڑی کھلی جیل بن چکی ہے جہاں آٹھ سال سے ڈیڑھ ملین آبادی بنیادی انسانی ضروریات سے محروم ہیں۔

فوزی برھوم نے کہا کہ ان کی جماعت "اونروا" کے سربراہ کے موقف کی تائید کرتے ہوئے عالمی برادری سے غزہ کی پٹی کا محاصرہ توڑنے کے لیے پرزور مطالبہ کرتی ہے۔ انہوں نے عرب ممالک اور مسلم دنیا پر بھی زور دیا کہ وہ غزہ کی پٹی کے بیرونی راستے بالخصوص رفح راہداری کو مستقل طور پر کھلوانے کے لیے مصر پر دباؤ ڈالیں۔ انہوں نے اقوام متحدہ سے بھی محصورین غزہ کے لیے امدادی کارروائیوں میں اضافے کا مطالبہ کیا۔